У Зэльвенскім раёне беражліва захоўваюць побыт мінулых гадоў
Арыгінальны праект рэалізоўваюць у Зэльвенскім раёне Гродзенскай вобласці — на базе нікому не патрэбных вясковых хат арганізуюць музеі сельскага быту.
На сёння створана сем такіх музеяў — па адным у кожным сельскім савеце, паведамляе выданне "СБ. Беларусь Сегодня". З экспанатамі актыўна дапамагаюць мясцовыя жыхары — яны не толькі прыносяць старадаўнія рэчы, але і распавядаюць звязаныя з імі гісторыі, што толькі павялічвае іх каштоўнасць.
Адметна, што рэалізаваць такі краязназнаўчы праект было вырашана ў Год народнага адзінства. Мясцовыя ўлады лічаць, што музеі будуць аб’ядноўваць насельніцтва, стануць своеасаблівым месцам сустрэчы пакаленняў. Напрыклад, бабулі змогуць наглядна паказаць унукам, якім быў сельскі быт у пачатку ХХ стагоддзя. Вядома, прыцягальнымі стануць музеі сельскага быту і для турыстаў — не шмат дзе можна ўвайсці ў звычайную вясковую хату і з галавой акунуцца ў мінулае.
Фото zelva-grodno-region.by.
